banner_neb

banner_neb

 

 

Яндекс.Метрика

Бур ёрт йылысь шоныда казьтылӧмӧн

Ноябр 23 лунӧ воис шог юӧр: кувсис журналист, гижысь Александр Васильевич Ульянов — Кулӧмдінса овмӧдчӧминъяслӧн шӧр библиотекалӧн бур ёрт, туйдысь-велӧдысь, ышӧдысь. 2005 воын Кулӧмдінса челядьлӧн шӧр библиотека мӧвпыштіс лэдзны медводдза книга, кытчӧ пырисны Вылыс Эжваса нималана гижысьяслӧн да школаса велӧдчысьяслӧн коми кывъя кывбуръяс. Быд гижӧд дорӧ лоис бӧрйӧма челядьлысь серпасъяс. Тайӧ вӧлі районса библиотекалӧн книга лэдзан уджын медводдза воськов. Донъявны позьтӧм отсӧг вичмис Александр Васильевичсянь, коді сэки веськӧдліс «Коми му» газет редакция котырӧн. Мыйсянь босьтчыны, кутшӧмджык кывбуръяс бӧрйыны, кыдзи дасьтыны типографияӧ мӧдӧдӧм водзын – став юалӧмӧн шыӧдчылім гижысь дорӧ. Сійӧ лӧньӧдліс миянлысь майшасьӧм, отсаліс, велӧдіс. Библиотекалӧн медводдза петас артмис бура: «Эзысь войтъяс» книга лоис челядьӧн лыддяна да наӧн радейтана, и таын зэв ыджыд пайыс Александр Васильевичлӧн.

Бӧръя воясӧ А. В. Ульянов вӧчис ыджыд удж чужан Дереваннӧй сиктсӧ нимӧдӧмын. Сылӧн водзмӧстчӧмӧн да отсӧгӧн петісны «Дереваннӧй сиктӧй – менам сьӧлӧмшӧр», «Ичӧт сиктӧй – олан гажӧй» книгаяс, «Медся муса чужанінӧй, кӧні коли челядьдыр» фотоальбом.  Гежӧд сикт вермас ошйысьны татшӧмторйӧн, кор ӧтув чукӧртӧма юӧръяс овмӧдчӧмин артмӧмсянь да ӧнія кадӧдз. Александр Васильевич сяммис котыртны да лэдзны тайӧ петасъяссӧ да таӧн нимӧдіс ичӧт чужанінсӧ нэмъяс кежлӧ.

Кулӧмдінса овмӧдчӧминъяслӧн библиотекаын эм Александр Васильевич Ульяновлӧн став книгаыс: «Сьӧд ар», «Изъя чой», «Выль керка», «Олӧмыдлӧн пыдӧсыс оз тыдав», «Дереваннӧй сиктӧй – менам сьӧлӧмшӧр», «Ичӧт сиктӧй – олан гажӧй» книгаяс, «Медся муса чужанінӧй, кӧні коли челядьдыр».  Гижысьлы медбур памятник – босьтны киӧ сылысь книгасӧ, гижӧдсӧ лыддигӧн кывны сылысь небыд шань гӧлӧссӧ, сувтӧдны син водзӧ чужан мулысь, кодӧс сійӧ помтӧг радейтіс, серпассӧ…

Кутам казьтывны Александр Васильевич Ульяновӧс медся бур, шань кывъясӧн.