Александр Васильевич Ульянов – Дереваннöй сиктлöн пи

Кöч тöлысь 20-öд лунö Дереваннöйын муніс Александр Васильевич Ульяновлöн югыд паметьлы сиöм казьтылана рыт. Таво Александр Васильевичлы тырис эськö 70 арöс.

Александр Ульянов (комиöн – Паш Вась Öльöксан, 1953–2021) – коми гижысь, журналист. Александр Васильевичлöн нимыс бура тöдса коми лыддьысьысьлы. Дыр кад сійö уджалiс корреспондентöн «Красное знамя» газетын, «Коми му» газетса редакторöн да редакторöс вежысьöн, «Войвыв кодзув» журналын редакторöс вежысьöн, веськöдлiс Коми небöг лэдзанiнöн. Уджавлiс «Эскöм» небöг лэдзанінын, «Войвыв кодзув» журналын юкöнöн  веськöдлысьöн. Гижысьлöн петавлісны небöгъяс коми, роч да мари кыв вылын. Сы отсöгöн Дереваннöй сикт йылысь петiсны кык небöг да фотоальбом – найö тöдмöдöны лыддьысьысьясöс сиктлöн историяöн, сэнi олысь йöзкöд, олöма йöзлöн казьтылöмъясöн.

Казьтылана рыт колис кыпыда да шоныда, уна сиктса йöз да гöсьт воисны бур кывйöн казьтывны гижысьöс.

Руч школаса велöдчысьяс зэв мичаа  лыддисны Александр Ульяновлысь мам да батьлы сиöм кыбуръяс, висьтъяс серти петкöдчисны серамбана сценкаясын.  Дереваннöй сиктысь «Парма шыяс» сьылан котыр да Аныб сиктысь «Пöлöзнича» народнöй ансамбль гажöдісны сьыланкывъясöн.

Пожöгса школаын коми кыв велöдысь Елена Александровна Игнатова, коді ачыс тшöтш гижö коми кывбуръяс да висьтъяс, бур кывйöн казьтышіс Александр Ульяновöс да лыддис ассьыс сьöлöм вöрзьöдана кывбуръяс. Серамбана висьтъясöн синва петмöн гажöдіс Иван Иванович Ногиев, сідзжö  висьталіс аслас гижысь котырö пырöм йылысь да казьтыштіс шмонитысь да шань Александр Ульянов йылысь.

Енбиа земляк йылысь пöся да сьöлöмсянь висьталісны Дереваннöй сиктса юралысь Елена Булышева, Кулöмдінса культура юкöнöн веськöдлысь Анна Башурина, Кулöмдінса овмöдчöминъяслöн библиотекаöн веськöдлысь Галина Пашнина, Аныб сиктса олысь, гижысьлöн бур тöдса Александра Моторина. Рыт нуöдысь Татьяна Николаевна Удоратина корис том йöзöс и водзö вылö тöдны, сёрнитны да сöвмöдны муса коми кыв, радейтны ас му.

Александр Ульянов йылысь кыдз шань, сибыд да шмонитысь морт йылысь паметьыс коляс нэмъяс кежлö, а сылöн гижöдъясыс дыр на шонтасны лыддьысьысьлысь сьöлöмсö.