«Поэт, вуджöдчысь, велöдысь» петас йылысь

Иона Тимофеевич Чисталёв, литература гусянимыс – Жан Морöс (1893–1923) – коми поэт, вуджöдчысь, критик, велöдысь; чужлöма Помöсдін сиктын.

Жан Морöслы чужöмсянь 130 во тыригкежлö Кулöмдінса Шöр библиотека дасьтіс петас «Поэт, вуджöдчысь, велöдысь = Поэт, переводчик, педагог» (2023).

Иона Чисталёвлöн творчество кузя торъя небöг эз на петавлы. Тайö петасö пыртöма Иона Чисталёв олöм да творчество йылысь статьяяс; сборникъясын, газет-журналъясын, öтуввезйын йöзöдöм да ки помысь гижöм художествоа гижöдъяс.

Петассö дасьтöма Коми Республикаса Национальнöй библиотека да Национальнöй архив фондъясысь босьтöм документальнöй материал подув вылын.

Иона Чисталёв пуктiс ыджыд пай коми сиктъясын школааяс восьтöмö да коми кывъя учебникъяс лэдзöмö. Сiйö лöсьöдiс «Шыпас йöртöд» – медводдза коми-зыряна букварь; гижис верстьöлы да челядьлы лов ышöдысь да серамбана кывбуръяс; комиöдiс А. Пушкинлысь, М. Лермонтовлысь, Е. Баратынскийлысь, А. Кольцовлысь, Н. Некрасовлысь, А. Толстойлысь кывбуръяс; комиöдiс «Интернационал» гимн. Небöгö пырисны гижысьлöн вуджöдöм кык висьт: «Кöдзыд ю дор керка» (Д.Н. Мамин-Сибиряк серти) да «Макар вöт» (В.Г. Короленко серти).

Вениамин Тимофеевич Чисталёв, Тима Вень, ёна шогалiс дзоляджык воклöн олöмысь кадысь водз мунöмысь. Петасын эм торъя юкöн «Тима Вень – воклы», кытчö пырисны «Ния» да «Шондi петiгöн, олöм кусiгöн» кывбуръяс.

Петасын казьтыштöма Иона Чисталёвлысь Прометей Чисталёв писö – ученöй-фольклористöс, шылад тэчысьöс, йöзкостса шылада инструментъяс чукöртысьöс. Пыртöма тшöтш сы йылысь гижöдъяс.

Тайö небöгыс адресуйтöма библиотекаса уджалысьяслы, литература да ас му туялысьяслы, велöдысьяслы, студентъяслы, велöдчысьяслы да налы, кодъяслы воö сьöлöм вылас Иона Чисталёвлöн творчествоыс.

Дона лыддьысьысьяс, «Поэт, вуджöдчысь, велöдысь» петас виччысьöй став районса шöр да сиктса библиотекаясын!