«Енэж вылын югыд кодзув»

Март 20-öд лунö муніс «Енэж вылын югыд кодзув» казьтылана рыт, сійöс сиöма поэт да журналист Александр Лужиковлы. Тавося март 19-öд лунö сылы тырис эськö 60 арöс, но тайö енбиа мортыс талун абу нин миянкöд орччöн, но миянкöд орччöнöсь сылöн юрйыв кодзув кодь чуймöдана кывбуръяс да мыла сьыланкывъяс.

Буретш, чужан сиктас – Кекурын казьтывлім Александр Лужиковöс. Уна кывбур поэтлöн юргис тайö казьтылана рыт вылас. И вöр-васö, и йöзсö, и коми оласногсö поэт петкöдліс аслыснога. Став кывбурыс – гуся мöвпъяс. Найö абу олöм, а вöт кодьöсь. Уна кывбурын пасйöд, мый «олöмыс гуга-бана, зыбуч нюр кодь – веркöсас ылöдчысь, вежöдысь туруна, мынтöдчыны позьтöм йир; олöмыс – вежöрлы сетчытöм, гöгöрвотöм». Александр Лужиков, гашкö, чужöмсяньыс нин тöдіс, кутшöмöн артмас олöмыс, мый ради воис сійö таладорас. Ассьыс олöмсö, туйвизьсö сійö туналіс-висьталіс аслас кывбуръясын. Кымын шогыс наын, кымын курыд синваыс! Гашкö, став олöмыс гижысьлöн татшöм и вöлі, позьö шуны, сійö пыр кыліс асьсö öткаöн, сы вöсна и лэдзис ассьыс став дойсö кывбуръясас.

Тайö казьтылана рытсö нуöдісны Пожöг школаса велöдысьяс: Татьяна Владимировна Шустикова да Михаил Иванович Шахов. Найö висьталісны гижысьлöн олан да творчество туйвизь йылысь. Гажöдісны тайö рытсö Пожöг культура керкаысь «Шудлун» сьылан котыр, «С песней по жизни» йöктан котыр, «Капелька» сьылан котырысь сьылысьяс – Александр Третьяков, Семён Уляшев да Карина Сенькина, а Феврония Кечкина лыддис кывбур. Сідзжö йöзöс гажöдісны Кекур детсадйö котралысь дзолюкъяс, найö лыддисны поэтлысь челядьлы сиöм кывбуръяс да нöшта зэв гажаа сьылісны. Петкöдчисны «Визув шор» да «Девчата» Кекур шойччан шöринысь сьылан котыръяс.

Да, вöлі кö поэт талун ловъя, сійö, эськö, ёна нимкодясис ас сиктсаяс вылö. Волісны казьтыштны Александр Лужиковлысь паметьсö Коми гижысь котырсянь Алексей Вячеславович Попов – коми прозаик да драматург, Россияса культураын заслуженнöй уджалысь, да Иван Куратовлöн литература музейöн веськöдлысь – Диана Григорьевна Холопова.

Александр Лужиков – Кекур сиктын чужлöм зонкасянь быдмис ыджыд нима гижысьöдз. Мед тайö казьтылана рытыс лоö сылöн енбилы муöдз копырöн!

Тайö жö лунö Ярашъю посёлокын вöлі кыпыд аддзысьлöм Алексей Вячеславович Поповкöд да Диана Григорьевна Холоповакöд.

Унджык фотография позьö аддзыны Пожöг библиотека группаысь: https://vk.com/pozegbib?w=wall-188466812_2767