Талун казьтылам Наталья Дубскаяöс

Напалкова (Дубская) Наталья Васильевна (1940–2022), талун, ноябр 19-öд лунö, эськö пасйис ассьыс 85-öд вося юбилей.

Наталья Васильевна чужлöма Украинаын, Крапивник сиктын. 1960-öд воö помавлöма сельхоз техникум Сыктывкарын, бöрынджык велöдчывлöма ветеринарнöй академияын Москваын да сельхоз институтын Ленинградын. Уджавлöма ветврачöн Удора, Кулöмдiн, Кöрткерöс районъясын.
Наталья Васильевна Напалкова 1997 восянь вöлi пырӧ Россияса журналистъяслӧн котырӧ, гижӧдъясыс петавлiсны Наталья Дубская сайним улын. Сійӧ йӧзӧдіс мыжтӧг мыждӧм украинечьяслы сиӧм вит книга. Вуджӧдіс роч кыв вылӧ Виктор Напалковлысь «Ме тіянӧс радейта», «Прӧстит, Аньтусьӧй», «Найӧ миян пӧвстын» книгаяс. 2020 воö аньлы сетісны Коми Республикаса заслуженнӧй уджалысьлысь ним.
Верöсыскöд – журналист, Коми Республикаса нимйӧза гижысь Виктор Егорович Напалковкöд, позьö шуны, выльысь ловзьöдiсны Джеджим грезд. Найö водзмöстчöм улын танi 2013 воын восьтiсны музей-библиотека, а 2017-ын – сы бердын этнойöр, кытöн öнi быд во нуöдсьö «Чужан сиктыд – кага потан» литература фестиваль.
Ми век бур да шоныд кывъясöн казьтывлам шань, ыджыд енбиа да сьöлöма йöзöс – Наталья Васильевнаöс да Виктор Егоровичöс, кодъяс быд локтiгöн вöлi вочаалöны бур кывйöн да нянь-солöн.

Талун Джеджимса библиотекаын чукöртчывлiсны грездса олысьяс, мед казьтывны миян дона Наталья Васильевнаöс.

Шöр библиотекаса уджалысьяс волiсны Напалков гозъя гу дорö Носимса шойна вылö.