«Коми йöзлы колöны сьыланкывъяс» книга нимöдöм

Декабр 17-öд лунö Кулöмдiнса шöр библиотекаын вöлi Сергей Викторович Таскаевлысь «Коми йöзлы колöны сьыланкывъяс» выль книга нимöдöм. Книгасö сиöма коми гижысь, Коми Республикаса нимйӧза поэт, журналист Василий Григорьевич Лодыгинлöн югыд паметьлы.

Сергей Викторович – краевед, уна во уджалiс челядькöд да вöлi «Наследие» нима поисковöй отрядлöн командирöн, эз этша вöч Габово грездлöн сöвмöмлы. Василий Григорьевич да Сергей Викторович вöлiны бур ёртъясöн, ёна аддзысьлiсны Габово грездын да олöм-вылöм йылысь сёрнитлiсны.

Талунъя лыддьысысьяскöд аддзысьлöм вылын кылiсны Лодыгинлöн мича сьыланкывъяс да сьöлöм вöрзьöдана кывбуръяс. Лои казьтылöма, кыдзи чужис «Василей» гаж, кымынысь гижысьлöн сьыланкыв вöлi гаж вылын вермысьöн. Виктор Уляшев гажöдiс локтысьясöс мича коми сьыланкывъясöн.

Кулöмдiн администрацияса культура да национальнöй политика юкöнöн веськöдлысь Анастасия Владимировна Голайдо висьталiс, кутшöм пай В.Г. Лодыгин пуктiс Эжва йывса культура сӧвмӧмлы.

Директорöс вежысь Светлана Кузьминична Тесленко тöдмöдiс Шöр библиотекалöн «Василий Лодыгинлöн паметьлы сиöм маршрут» выль уджтасöн. Уджтасыс пырöдчис Россияса конкурсö да  шедöдiс Грант Президент культура водзмӧстчӧмъяс фондысь.

Книга презентация бöрын гöсьтъяс тöдмасисны кык выставкаöн: öтиыс – С.В. Таскаевлöн петасъяс, мöдыс сиöма В.Г. Лодыгинлöн олöмлы да творчестволы.