Мария Плосковасянь козин

Мария Алексеевна Плоскова – миян Шöр библиотекалӧн бур ёрт, ас му туялысь, журналист. Чужанiнö оз лок куш киöн: быд волiгöн вöчö козин миян районса лыдьысьысьяслы – вайö ас му туялан небöгъяс. Библиотекаясын сыкöд нуöдсьöны аддзысьлöмъяс.

М.А. Плоскова бара на козьналiс выль небӧгъяс:

В.В. Климовлысь «Гавкалӧн палич» повесьт, кытчӧ пырисны легендаяс;

«X Налимовские чтения» петас, лэдзӧма Сыктывдiн районса Выльгорт сиктын 2025 воын;

«Семейное древо» ордпувуж книга-альбом;

уна серпаса да фотографияа витöд том «Пермь Великая» книга.

Тöдчанаöн лоö сiйö, мый «Гавкалӧн палич» повесьтсӧ комиӧдiс Мария Алексеевна да 2011 воын книгасö  йöзöдiсны Сыктывкарын. Небӧг бердас пуктӧма DBD-диск, кӧнi гижысьыс висьталӧ ас йывсьыс, татчӧ жӧ пыртöма коми кыв вылын кывзӧм вылö  «Гавкалӧн палич» повесьт.

Регыд лыддьысьысьяслöн лоö позянлун тӧдмасьны тайӧ небӧгъяснас миян районса библиотекаясын.

Висьталам зэв ыджыд аттьӧ Мария Алексеевналы небӧгъяс козьналӧмысь!