Шог юöр

Бара на зэв шог юöр. Кувсис Василий Григорьевич Лодыгин. Журналист. Коми Республикаса Народнöй Поэт. Ыджыд сьöлöма морт, кодлы Енмыс сетöма ассьыс бисö чукйöн. Чужан мулысь мичлунсö сьылысь. Коми йöзлысь тöжд-майшöгсö пыдiсянь гöгöрвоысь, ас мулысь дойсö сьöлöм пырыс лэдзысь да кывбуръясын петкöдлысь. Некор эз копрасьлы чин водзын, сёрнитлiс веськыда.Чужан коми кыв ыджыда пыдди пуктысь, сы вöсна нэмсö тöждысьысь, сыöн кужöмöн да зэв видзчысьöмöн вöдитчысь. Поэт-лирик, кодлысь кывбуръяссö абу на тырвыйö донъялöма. Сылöн поэзияыс сэтшöм вылi тшупöдын, мый öдвакö кодкö локтан кадö вермас кöть неуна матыстчыны сы дорö.

Öнiя кадся коми сьыланкывъяслöн «Василей» фестиваль-конкурс пестысь да сöвмöдысь, ачыс гижис мичасьыс-мича сьыланкывъяс, кодъяс юргöны радиоын да телевидениеын, найö «петiсны» йöзö да лоисны медся радейтанаясöн. Тырмис тай сямыс и кывъяссö гижны, и шыладсö.

Василий Григорьевич вöлi Кулöмдiнса овмöдчöминъяскостса библиотекалы бур ёртöн. Волiс лыддьысьысьяскöд аддзысьлöмъяс вылö, козьналiс ассьыс книгаяс. Зэв ёна отсасис «Восьта öшиньöс ме» книга лэдзöмын, кодöс сиöма Коми литературалы подув пуктысьясысь öтилы – Тима Веньлы.

Василий Григорьевич вöлi ыджыд тöжда и томулов вöсна: кутiс топыд йитöд библиотекаöд, коми кыв да литература велöдысьяскöд, зiлис накöд öтув корсьны енбиа челядьöс, кодъяслöн сьöлöманыс дзирдалiс гижан сямлöн би кинь, котыртлiс найöс велöдöм, мед би киньыс паськалiс да лоис яра ломзьысь бипурöн.

Василий Григорьевичкöд мунiс дзонь эпоха – журналистикаын, литератураын. Сы йылысь паметь коляс нэмъяс кежлö. Сьыланкывъясын, кывбуръясын, гижöдъясын.