Мы в соц. сетях: vk.com

Наш адрес: Республика Коми
с. Усть-Кулом ул. Советская, д. 35


E-mail:  uklcbs@mail.ru


Телефон: 8(82137)94301
       
               Поиск по сайту:

 

 

Яндекс.Метрика

«Эжва йывлӧн югыд кодзув»

Кос му 5-ӧд лунӧ Сыктывкарын, И.А. Куратов литература музейын, мунiс «Эжва йывлӧн югыд кодзув» казьтылана рыт, сiйöс сиӧма журналист, Коми Республикаса Народнöй поэт, композитор, ас мулысь дойсö сьöлöм пырыс лэдзысь да кывбуръясын петкöдлысь – Василий Григорьевич Лодыгинлы, сылӧн олӧм да творчестволы.

Талун кежлӧ Лодыгинлӧн йӧзӧдӧма коми кыв вылын «дойӧн да нюмӧн» гижӧм дас квайт небӧг. Василий Григорьевич пуктiс зэв ыджыд пай Эжва йывса культура сӧвмӧдӧмлы. Гижис олӧмбыдӧн кыксё гӧгӧр мичасьыс-мича коми кывбур, кодъяс лоисны сьыланкывъясӧн: унджыкыс на пиысь юргöны радиоын да телевидениеын, а кызь нёль сьыланкыв лоис «Василей» гаж вылын вермысьяслӧн лыдын. Лодыгинлӧн сьыланкывъяс лоисны радейтанаясöн став коми му пасьтала. Василий Григорьевич Лодыгин вӧлi Кулӧмдiн районса, Коми Республикаса зэв тӧдчана, пыдди пуктана мортӧн.

Василий Лодыгинлы югыд паметьлы сиӧм рыт колис зэв шоныда. Рыт вылын юргисны поэтлöн кывбуръяс да сьыланкывъяс. Кывбуръяс лыддис Ольга Чисталева. Сьыланкывъясöн петкöдчисны Сергей Ефремов, Ангелина Смирнова, Карина Сенькина, «Шудлун» сьылан котырысь сьылысьяс Екатерина Уляшева да Полина Сенькина.

Пöся да сьöлöмсянь висьталісны Василий Лодыгин йылысь Кулöмдінса культура юкöнöн веськӧдлысьлысь удж вöчысь Анна Башурина, Кулöмдінса овмöдчöминъяслöн библиотекаöн веськöдлысь Галина Пашнина, литература музейлöн юкöнöн веськӧдлысь Диана Холопова, Республикаса «Арт» журналöн веськöдлысь Татьяна Логинова, «Войвыв кодзув» журналлöн редактор Алексей Полугрудов, «Наследие» поисковöй отрядлöн командир Сергей Таскаев.

Нормана кывъясöн висьтыштісны коми поэт да композитор йылысь миян нималана коми сьылысь Лидия Логинова да ас му туялысь, журналист Мария Плоскова.

Коми Республикаса гижысьяслöн котырсянь сьöлöм вöрзьöдана кывъясöн казьтывлісны Василий Григорьевичöс Алёна Ельцова, Олег Уляшев, Иван Ногиев.

Ми ставöн, кодъяс вöлiм тайö казьтылана рыт вылас, воим öти кывйö: Василий Григорьевичкöд мунiс дзонь эпоха – журналистикаын, литератураын. Сы йылысь паметь коляс нэмъяс кежлö сьыланкывъясын, кывбуръясын, гижöдъясын.

 

 

Висьталö Наталья Кузнецова, «Миян кад» передача нуöдысь (радио «Коми гор»)