Мы в соц. сетях: vk.com

Наш адрес: Республика Коми
с. Усть-Кулом ул. Советская, д. 35


E-mail:  uklcbs@mail.ru


Телефон: 8(82137)94301
       
               Поиск по сайту:

 

 

Яндекс.Метрика

«Виччысян кö — воа»

Сентябр 27 лунӧ районса культура керкаын кыпыда чолӧмалісны тшупӧда пасӧн, 70 арӧс тырӧмӧн, Россияса гижысьяс котырö пырысь, «Миян Кулӧмдiн» газетлöн вöвлöм шöр редактор, ставлы тöдса да зэв пыдди пуктана гижысь Иван Иванович Ногиевӧс (Парма Ваньӧс).
1952 воын сентябр 18-öд лунö Кулöмдiн районса неыджыд Парма грезд чужтіс да сетiс коми йöзлы ыджыд енбиа мортöс, кодлы Енмыс талантсö козьналӧма чукйӧн.
Иван Иванович помаліс Егорьевскса авиационнöй училище, а сэсся куим во уджаліс Печораын вертолётъяс бердын техник-механикöн. Но сьöлöмыс эз бурмы, да водзö на велӧдчис. Помалiс Сыктывкарса университетын физика-математика факультет, бöртиджык велӧдiс Кулöмдiнса шӧр школаын.
Кулöмдінса РОВД-ын уджалiгӧн сюртчис гижан уджӧ. Сылӧн медводдза висьт петавліс «Ленин туйӧд» газетын 1993 воын. Иван Иванович гижӧ да йӧзӧдчӧ матӧ кызь во нин, и сійӧс бура тӧдӧны оз сӧмын миян районын, но и республикаын. Висьтъяс петалісны «Би кинь», «Чушканзі» да «Войвыв кодзув» журналъясын. Талун кежлӧ Иван Ивановичлöн петiс куим небӧг. Сійӧ унаысь вермывліс «Эзысь борд» республикаса литература конкурсын.
Иван Иванович ыджыд тöжда сиктса олысьяс вöсна. «Миян Кулӧмдін» газетын редакторалігӧн кутiс топыд йитöд велöдысьяскöд, чужан му туялысьяскӧд, зiлис накöд öтув корсьны сикт да йӧз йылысь колана юӧр, петкӧдлыны вежсьӧмъяс, тӧжд-могъяс да выльторъяс. Тайö удж йылысь аддзысьлӧм вылын казьтыліс Валентина Петровна Нестеренко уджъёртыс.
Иван Иванович Кулöмдiнса овмöдчöминъяскостса библиотекалы бур ёрт. Зэв ёна отсасьӧ «Живая классика» быд вося конкурс нуӧдігӧн, библиотекаръяскӧд ӧтув донъялӧ енбиа челядьлысь петкӧдчӧмсӧ. Гижысь нимкодьпырысь козьналӧ ассьыс книгаяс, тшӧкыда волӧ лыддьысьысьяскöд аддзысьлöмъяс вылö. 2018-ӧд воын библиотека пырӧдчис Маттиас Кастрен нима обществоӧн котыртӧм конкурсӧ да шедӧдӧм сьӧм вылӧ лэдзис сборник, кытчӧ пырис и Иван Ивановичлӧн «Евлог да сылӧн ёртъяс» книга. Сiйö жӧ воын библиотекаса уджалысьяс да гижысь пуктiсны сылӧн «Выль паспорт» висьт кузя неыджыд спектакль. Сійӧс лоис петкöдлӧма синтӧмъяслы Луи Брайль нима Коми республикаса торъя библиотекаысь уджъёртъяс водзын.
И. И. Ногиевлысь гижӧд радейтысьяс пиысь эз ставныс вермыны волыны аддзысьлӧм вылӧ, но найӧ мӧдӧдісны видео-гижӧд. Пӧся чолӧмалісны Иван Ивановичӧс тшупӧда пасӧн Ручса шӧр школаысь коми кыв да литература велӧдысь Диана Алексеевна Гребенюк, Пожӧг шӧр школаса веськӧдлысьӧс вежысь Альбина Петровна Коснырева, серамбана видео-юалӧмъяс сетісны Пожӧгса лыддьысьысьяс.
Зэв мича, сьӧлӧма, шань кывъяс сиисны гижысьлы ёртъяс, ӧти классын вӧвлӧм велӧдчысьяс, лыддьысьясьяс. Ставӧн сиисны дона ёртлы зумыд дзоньвидзалун, тыр-бур олӧм семьяын, кузь нэм да бур шуд, водзö вылö аддзыны выль мöвпъяс, сюжетъяс да енбиа гижöдъясöн гажöдны лыддьысьысьясöс.
Кывкöртöдын Кулöмдiн библиотекаса веськöдлысь Галина Егоровна Пашнина пӧся аттьӧаліс Иван Ивановичӧс ёртасьӧмысь.
Чукӧртчӧм вылӧ локтысьясӧс гажӧдісны Виктор Уляшев, Районса культура керкаысь да челядьлысь енби сӧвмӧдысь керкаысь сьылысь котыръяс, И. И. Ногиевлӧн ёртъясыс.